पोखराको एयरपोर्टमा गत मंगलबार माइक्रोबसको ठक्करपछि गंभिर घाइते भएका युवक सन्दिप पौडेलको पनि मृत्यु भएको छ । पौडेलको उपचारको क्रममा गण्डकी मेडिकल कलजेमा बिहिबार बिहान मृत्यु भएको हो । एयरपोर्ट अगाडी मंगलबार बिहान ग १ ख ३८७७ नम्बरको माइक्रोबसले ग ९ प २१९१ नम्बरको पल्सर मोटरसाइकललाई ठक्कर दिएको थियो ।
माइक्रोको ठक्करवाट मोटरसाइकलमा सवार गुप्तेश्वर माविमा बीबीएस दोश्रो बर्षमा अध्ययनरत २२ बर्षीय शोभाकान्त पनेरुको तत्कालै मृत्यु भएको थियो । ठक्करवाट गम्भीर घाइते भएका मोटरसाइकल चालक पौडेलको तीन दिन पछि ज्यान गएको हो ।
मृतक दुबैको बिहिबारै अन्त्यष्टि गरिएको छ । पनेरुको सेती रामघाटमा तथा पौडेलको दोविल्ला घाटमा अन्त्यष्टि गरिएको हो । मृतक दुवैका परिवारले बिहिबारनै शव बुझेका हुन् । यसअघि पनेरुको मृत्युपछि विद्यार्थी र आफन्त आन्दोलित बनेका थिए । उनीहरुले बुधबार दिउँसो पोखरामा सार्वजनिक यातायात सञ्चालनमा समेत अवरोध पु¥याएका थिए ।
मृतक दुवैका आफन्तले चालक दिप्तीनारायण ढकाललाई हदैसम्मको कारवाही हुनुपर्ने माग गरेका छन् । ‘प्रशासनले उनलाई कडा कारवाही गर्ने आश्वासन दिएकालेनै हामीले शब बुझेका हौ’ मृतक पनेरुका ठुलोबुवा दुर्गाप्रसाद पनेरुले बताए । ‘हामीलाई ५ लाखको प्रलोभन देखाइएको छ, तर हाम्रो माग चालकलाई कडा कारवाही हुनुपर्छ भन्ने हो’ उनले भने । विमा वापत नियमलेनै पाइने पाँच लाख देखाउँदै कसैको ज्यान लिन नपाइने उनको भनाई छ । ‘पाँच लाख तिरेर मान्छे मार्न पाइने, यो कस्तो कानुन हो ?’ उनले प्रश्न गरे । त्यस्तै अर्का मृतक पौडेलका आफन्त हुमप्रसाद अधिकारीले पनि प्रशासनले चालकलाई कडा कारवाही नगरे फेरी सडकमा आउन बाध्य हुने चेतावनी दिए । पनेरु स्याङ्जा घर भइ हाल ड्यामसाइड बस्दै आएका थिए भने अर्का मृतक २४ वर्षिय सन्दीप पौडेल पोखरा लेखनाथ महानगरपालिका वडा २१ का बासिन्दा हुन् ।
घटनापछि आन्दोलित बनेको पोखराका विद्यार्थीहरुले बुधबार दिनभर पोखराको सडकमा नाराबाजि गरेका थिए । आन्दोलित विद्यार्थीले मान्छे मार्न पाइँदैन, हत्याको निष्पक्ष छानबिन गर, चालकको लाइसेन्स खारेज गर लगायतका नाराबाजी गरेका थिए । बिद्यार्थीहरुले बुधबार बिहानः करिब ८ः३० बजे देखि दिउसो २ः०० बजेसम्म पोखराको राष्ट्रबैंकचोक, सृजनाचोक र सभागृहचोकमा नारा जुलुस गर्दै माईक्रोबस चालकलाई ज्यान मार्ने मुद्धा चलाई लाईसेन्स खारेजी गर्नुपर्ने नारा समेत लगाएका थिए ।
माईक्रोबस चालकको लापरवाहीको कारण पोखरामा सडक दुर्घटना बढ्दै गएकोले त्यसको बिरोध स्वरुप आफुहरु सडकमा उत्रिनु परेको सहभागि एक बिद्यार्थी इश्वर भुजेलले पोखरा न्युजलाई बताए । अर्को बिद्यार्थी अनिस ढकालले प्रहरी प्रसासनले आफुहरुको शान्ति पुर्ण आन्दोलनमा दमन गरेको आरोप लगाए । बिद्यार्थीहरुले सडकमा नारा जुलुस गर्दै पोखरा बस ब्यबसायी समितिद्धारा संचालन भएका बसहरुलाई संचालन नगर्न चेतावनी दिदा समितिका केहि बसहरु केहि समय रोकिएका थिए । बस चालकलाई कडा कारवाही नभए आफुहरु फेरी सडकमा उत्रने विद्यार्थीहरुले चेतावनी दिएका छन् ।
माईक्रो बस चालक स्याङजा आधिखोलाका ३६ बर्षीय दिप्ती नारायण ढकाललाई प्रहरीले आफ्नो नियन्त्रणमा लिएको छ ।
तस्बीर- बिद्यार्थीहरुको आन्दोलन