प्रेस काउन्सिल नेपालका पदाधिकारीप्रति लक्षित गरी फेसबुकमा आपत्तिजनक कुरा लेख्ने दुई जनालाई प्रहरीले पक्राउ गरेको छ। पक्राउ पर्नेमा इलाम घर भई ललितपुरको बागडोल बस्ने ५० वर्षीय विनोद गौतम र नवलपरासी सुनवल नगरपालिकाका ३६ वर्षीय विष्णु ढकाल रहेका महानगरीय अपराध महाशाखाले जनाएको छ। प्रहरीले गौतमलाई काठमाडौंको टेकुबाट र ढकाललाई नवलपरासीको सुनवलबाट पक्राउ गरेको हो।
न्यूज २४ टेलिभिजनबाट प्रशारण हुने ‘सीधा कुरा जनतासँग’को विषयमा परेको उजुरीको छानबिनको घटनालाई आधार बनाई नेपाल प्रेस काउन्सिलका पदाधिकारीलाई फेसबुकमार्फत आपत्तिजनक शब्द लेखेको र ज्यान मार्नेसम्मको धम्की दिएको प्रहरीले दाबी गरेको छ। गौतम र ढकाललाई विद्युतीय कारोबार ऐन अन्तर्गत अनुसन्धान कारवाहीको लागि महानगरीय प्रहरी परिसर, काठमाडौंमा पठाइएको अपराध महाशाखाले जनाएको छ।