ट्रम्पले सार्वजनिक गरे किम जोङ–उनको पत्र

असार २९, २०७५/ काठमाडौं – अमेरिकाका राष्ट्रपति डोनल्ड ट्रम्पले किम जोङ–उनको एक पत्र प्रकाशित गरेका छन् जसमा उत्तर कोरियाली नेताले द्विपक्षीय सम्बन्धमा ‘नयाँ भविष्य’ को आशा व्यक्त गरेका छन् । ट्रम्पले किमबाट एक हप्ताअघि प्राप्त पत्र ‘एकदम राम्रो’ भनी प्रतिक्रिया दिए ।

पत्रमा प्योङयाङले निःशस्त्रीकरणका लागि गरेको कुनै पनि प्रयासको उल्लेख गरिएको छैन । सिंगापुरमा यी दुवै नेताबीच भएको ऐतिहासिक सम्मेलनका बेलामा कुराकानी गरिएको प्रमुख विषय नै पत्रमा परेको छैन । किमले पठाएको चार अनुच्छेदयुक्त पत्रको अंग्रेजी अनुवाद ट्रम्पले बिहीवार ट्वीट गरेका थिए ।

पत्रमा किम लेख्छन् : ‘म महामहिम राष्ट्रपतिबाट गरिएका उत्साहपूर्ण र असाधारण प्रयासको गहिरो प्रशंसा गर्छु ।’ उनले द्विपक्षीय विश्वासलाई भविष्यको प्रक्रियालाई थप सुदृढ बनाउनुपर्ने बताए । किमले द्विपक्षीय सम्बन्धको प्रवर्द्धनका लागि भएका युगान्तकारी प्रगतिले हामीबीचको अर्को भेट सम्भव गराउने लेखे । यो पत्र प्रकाशित गरेर राष्ट्रपति ट्रम्पले ट्वीट गरे, ‘ठूलो प्रगति गरिँदैछ ।’ उनले यसको थप व्याख्या गरेनन् ।

अर्को प्रसंगमा अमेरिकाले उत्तर कोरियाविरुद्ध प्रशोधित तेल उत्पादनमा संयुक्त राष्ट्रसंघले निर्धारण गरेको प्रतिबन्धको उल्लंघन गरेको आरोप लगाएको छ । अनि अर्को प्रसंगमा उत्तर कोरियाका अधिकारीहरू सन् १९५०–५३ को कोरियाली युद्धमा मारिएका अमेरिकी सैनिकको भौतिक अवशेषलाई अमेरिका फिर्ता गर्ने विषयमा हुने वार्तामा भाग लिन आएनन् ।बीबीसीबाट