भक्तपुर, , ६ मंसिर । भक्तपुरको सूर्यविनायक नगरपालिका–२ रेडक्रस भवननजिक टिपर र मोटरसाइकल आपसमा ठोक्किँदा १ जनाको मृत्यु भएको छ भने अर्का १ जना घाइते भएका छन् । बा. ४ ख ८१८२ नं. को टिपरमा बा. ९९ प ८२८२ नं. को मोटरसाइकल बुधबार राति ८ः३० बजे ठोक्किँदा मोटरसाइकल पछाडि सवार महोत्तरी बर्दिवासका २४ वर्षीय मनोज मगरको मृत्यु भएको हो ।
मोटरसाइकलका चालक २३ वर्षीय राज पोख्रेल सामान्य घाइते भएका छन् । टिपरको ठक्करबाट घाइते मगरलाई उपचारका लागि बी एन्ड बी अस्पताल, ललितपुर लगिएकामा उपचारका क्रममा मृत्यु भएको महानगरीय प्रहरी परिसर भक्तपुरका सूचना अधिकृत प्रहरी नायव उपरीक्षक रेवतीरमण पोखरेलले जानकारी दिए ।
टिपर चालक काभ्रे रोशी गाउँपालिका–१२ का अनिल तामाङलाई टिपरसहित प्रहरीले नियन्त्रणमा लिएको छ ।