ललितपुर: ललितपुरमा मध्यराति लुटेराले छुरा हानेर ट्याक्सी चालकलाई गम्भीर घाइते बनाएका छन् । यात्रु बनेर चढेका दुई लुटेराले छुरा हानेर ट्याक्सी चालकलाई घाइते बनाएका हुन् ।बा १ ज ६१५७ नम्बरको ट्याक्सीका चालक ४२ वर्षीय डम्बर खड्कालाई मंगलबार राति छुरा हानिएको हो । छुरा प्रहारबाट उनको देब्रे आँखा फुटेको छ ।
ललितपुरस्थित पुल्चोक सेन्ट जेभियर्स स्कुलनजिक दमकल भन्ने स्थानबाट बिरामी बनेर काठमाण्डुको शंखमुल जाने भनी उक्त ट्याक्सी चढेका दुई व्यक्तिले बालकुमारी पुलबाट करिडोरको पाँच सय मिटर पश्चिम पुगेपछि चालक खड्कामाथि अचानक धारिलो हतियार प्रहार गरेका थिए।
अन्दाजी २५ वर्षीय कालो वर्णका युवक र ३५ वर्षीय गोरो वर्णका हल्का दारी पालेका व्यक्तिले आफूमाथि छुरा प्रहार गरी लुटपाट गरेको पीडित चालकले बताएका छन् । उनीहरूले आफूसँग रहेको ६ हजार रुपैयाँ र एक थान मोबाइल सेट लुटेर लगेको उनले बताए ।
प्रहरीका अनुसार लुटेराहरूको आक्रमणबाट चालक खड्काको बायाँ आँखा फुट्नुका साथै टाउकोमा गम्भीर चोट लागेको छ ।पाटन अस्पतालपछि थप उपचारका लागि घाइते खड्कालाई बुधबार बिहान पौने ४ बजेतिर वीर अस्पतालको ट्रमा सेन्टरमा लगिएको छ । घटनाको अनुसन्धान सुरु गरिएको प्रहरीले जनाएको छ ।