१८ फागुन, काठमाडौँ । प्रधानमन्त्री केपी ओलीले सरकारको पहिलो प्राथमिकता आर्थिक समृद्धि भएको बताएका छन् ।
मनमोहन कार्डियोथोरासिक भास्कुलर तथा ट्रान्सप्लान्ट सेन्टरको शिलान्यास गर्दै उनले मुलुक अब आर्थिक समृद्धिको बाटोमा अगाडि बढ्ने बताए । भ्रष्टाचार गर्ने जो कोहिलाई सरकारले नछाड्ने भन्दै उनले भ्रष्टाचार अन्त्य गर्नका लागि सहयोग गर्न सबैसँग अपिल गरे ।
बहुमत प्राप्त सरकारले जनतामुखी काम गर्ने भन्दै ओलीले जनताको काम तुरुन्त गर्न राष्ट्रसेवकलाई निर्देशन दिए । अस्पताल सेवामुखी हुनुपर्ने भन्दै ओली बिरामीको सेवालाई पैसासँग नदाँज्न आग्रह गरे ।
पहिले उपचार, त्यसपछि पैसा भन्दै ओलीले आर्थिक अभावका कारण उपचारबाट बञ्चित हुनुपर्ने अवस्थाको अन्त्य गरिने बताए ।
२३ आना क्षेत्रफलमा निर्माण हुन लागेको मनमोहन कार्डियोथोरासिक भवन ३० करोड रुपैयाँको लागतमा बन्ने छ । भवन १९ महिनामा निर्माण भईसक्ने छ भने सुविधा सम्पन्न ४० वटा बेड थपिने अस्पतालका कार्यकारी निर्देशक डा.उत्तमकृष्ण श्रेष्ठले बताए ।